2009-09-26 SING街肥媽、陳潔靈樂壇雙俠寸爆港男

蘋果日報 C26 娛樂名人
2009-09-26

SING街肥媽、陳潔靈樂壇雙俠寸爆港男


陳潔靈和瑪利亞（肥媽）近日分別擔任無《超級巨聲》和亞視的《亞洲星光大道》評判，因其精闢意見而人氣急升，兩位唱家班的事業再逢第二春，下月20日及21日她們更會與葉麗儀踏上紅館開騷，工作浪接浪。肥媽與陳潔靈日前接受本報記者專訪，甫見面就攬攬抱抱，肥媽還大笑道：「總之我就係背脊插刀啦！」旁人連忙更正是「兩脅插刀」，逗得陳潔靈哈哈大笑。時代女性，要做好媽媽又要做職業婦女，可謂腹背受敵，還得保持新鮮感挑起丈夫興趣，果真應了肥媽一句「背脊插刀」。港女點拜金拜物質，詹瑞文笑到爛，港女眼中的港男是如何又聽過未？撰文：吳佩思

肥媽：香港男人自卑

肥媽、陳潔靈和葉麗儀，名正言順「三個女人一個墟」開演唱會，加上耀榮叔一句「唔識聽英文」，三人乖乖轉唱粵語歌，不過，英文歌照唱，各種形式crossover保證令你驚喜重重，還有一個為顧嘉煇及向已故的羅文致敬環節，有些歌，你想像不到她們會唱，更想像不到她們會這樣唱，陳潔靈如是說。

麻甩佬自卑要面

想像不到是今次三大天后要唱男人。始作俑者是肥媽，一講起男人，她滿肚鬱氣說：「冇女人去講男人，搞到女人地位好低，好似成日要我女人去迎合男人，點解唔可以要男人迎合我？佢成日度講港女，咁就賺錢o架喇，咁樣好唔公平。我覺得香港女人其實好勤力，我呢一班都係刻苦耐勞，係大大大大大大大長今o架大佬。既要做現代阿媽，又要做現代太太，又要做職業婦女，我唔夠膽講話第二女人冇，但如果成日話港女港女咁樣好唔公平，所以希望畀個機會我講啦，淨係得你班麻甩佬講女人o架？」肥媽一輪嘴，中間唔使氣，繼續數：「香港男人要威，又有自卑喎，因為男人要威，我娶個叻女人返點得呀？點解你唔識欣賞呢個女人屋企一樣可以咁成功，係因為你冇畀機會我！部份男人淨係睇女人年紀身材同外貌，日日都話18歲卜卜脆，我日日畀個18歲你，冇思想嘛！ 點解男人鍾意去拈花惹草呢？因為男人鍾意你呃佢，仲停留女子無才便是德，仲想三妻四妾，你有本事養晒咁多個你咪娶囉，但o依家又唔係喎，冇咁數o架呢個世界！」

恨前夫另結新歡

肥媽一講起香港男人就火起，轉台講老公，即刻眼濕濕。無他，第一段婚姻發生在18歲，一時衝動嫁給年紀比她大20多年的丈夫，他生意失敗後就留在家中專心鬧情緒，肥媽二話不說獨力帶大6個仔女，其中4個更非由她所出。由做苦力在上環抬粉、餐餐豉油撈白飯捱到做酒廊收銀，何止撐起半邊天，偏偏丈夫嫌她在家中太霸道，另覓新歡離婚去也。直至99年肥媽才遇上現在的丈夫阿Rick，從前得不到的幸福，今次一鋪過連本帶利收番，她說：「我o依家好開心，我仔冇爸爸十幾年，我老公Rick幫佢搵番出。」之前提過，肥媽年輕時一時衝動結婚，其實少女Maria本有一個青梅竹馬的拖友仔，初戀，還訂了婚。有次兩人狠狠吵了場架，少女Maria一時意氣取消婚約，還未想清楚便嫁給另一個男人。蠢，真蠢。

講初戀泣不成聲

年屆55歲的肥媽顛簸半生，從冇到有，根本無暇懷念少女情懷，偏偏是陳潔靈挖起她心底最深層的感受，皆因肥媽提議闢一環節講男人，陳潔靈就提出在另一環節講女人，還要求兩位拍檔回憶心路歷程，結果肥媽一想就想起初戀，泣不成聲，她說：「初戀幾乎唔記得啦，但係我一生真係因為咁而改變，真係一時之氣，邊有人咁拗氣，我喊係為乜呢？我未試過覺得自己蠢，唔知係咪自己個人老，我以前成日同人講：『車，咁又點，我衰得起呀！』今次係第一次，我諗起第一段情會喊，50幾60歲，未試過，然後第一次鬧自己蠢。」

陳潔靈：崩潰中學習復原

陳潔靈丈夫張耀榮6月病逝，現在的她神氣清朗，傷痕從表面上看不出，並非故作鎮定。丈夫離世剛好三個月，陳潔靈上月在台灣賑災活動上還激動痛哭，但她已從崩潰中慢慢學習復原，由唱歌到禪修，一天一點進步。

禪修控制情緒

陳潔靈說：「或者到時會台上面講一好個人，其實觀眾係八卦，觀眾容易有代入感同親切感。今次對我講，係一難控制情緒，咁個情緒唔可以話『喂，我到時先算啦！』今次唔得。o依家呢個時候你要將自己訓練到唔係機器，係有，因為你一定要令你記憶層面經過、試過、做過，咁個人就唔會咁容易個崩潰邊緣。因為始終觀眾係關心你，唔係想睇你崩潰，總之生理上心理上都要有預備，真係要自己每一日都要試過，絕對唔容易。」現在陳潔靈學習禪修，令情緒得以平復，也藉這種學習，令她得到一些從沒體會過的感覺，她說：「禪修其實令我睇到好多，無論你個人點樣好、點樣樂觀，有突發真係好難接受，禪修就係令到我基本個人寧靜、平靜，同埋知道人生究竟係乜一回事，然後學習接受。」

自嘲井底之蛙

陳潔靈續說：「我以前都覺得自己好樂觀，但係當我去探索好多時候，我會發覺自己其實係井底之蛙。以前以為好多唔係一就係二，唔係二就係三，原來仲有四五六，但我從來都冇睇過有四五六，咁你一定要發掘佢，先發現原來人生入面境界係咁闊。」

-勸《巨聲》參賽者放低包袱-

講起陳潔靈與肥媽，很自然就會聯想到無《超級巨聲》和亞視《亞洲星光大道》，兩位好姊妹打對台分別任兩個節目的評判。肥媽表示沒有看過《超級巨聲》，陳潔靈一味讚各評判意見中肯，獨愛來自台灣的陳珊妮，談到肥媽，她笑道：「肥媽我就費事講啦，太擦鞋喇。」

慨嘆比賽變質

陳潔靈擔任《超級巨聲》評判不久，有人讚她一矢中的，有無知網民人身攻擊罵她「死老公唔係大晒o架！」陳潔靈是知道的，沒有動氣，她說：「我等好耐先有一個咁樣歌唱比賽，我都係歌唱比賽出身，有段時間我覺得有歌唱比賽好氣，個個人都唱半段，又要你踩單車唱，真係離晒譜，真係突然間有一個咁正式歌唱比賽，對呢班後生仔講係一個好大機會，我希望佢可以好好把握，進步多，亦希望佢明白每一樣都有代價。」《超級巨聲》參賽者須過五關斬六將，壓力之大非外間所能想像，陳潔靈眼看他們一點一點地變，亦愛莫能助，她說：「佢做做時候已經忘記點解要報名參加比賽，個focus集中錯地方，佢有時會集中個包袱度囉，譬如人點樣睇佢呀、好多是非呀，媒體點樣寫佢呀，成件事已經變。個節目太長喇，始終又變個騷。我第一日見班參賽者，就同佢講，諗番自己點解要參加比賽，額外包袱，掉佢，但係你知道後生仔好難做到。」

-為謝安琪走音抱不平-

話題轉到近期多次失準走音的新紮天后謝安琪（Kay），早前有網民將她的走音片段拼湊在一起，還加插肥媽在《亞洲星光大道》的抵死評語，有人大呼過癮，陳潔靈為Kay抱不平說：「一個人幾叻都好，尤其講緊除生理，仲要思路，好多係相對，例如佢人生體會唔夠多，個腦唔夠安靜，就會力不從心，然後就躁、緊張。o依家你講緊好高技巧，你對佢有要求，碧咸都會射失12碼啦，但佢緊要關頭冇射失嘛！」

「佢都冇時間」

陳潔靈繼續力撐Kay：「佢太喇，而且要承受壓力太大，根本心理上同生理上個包袱好重，啄住佢係好唔公平。佢越多表演節目就越容易出錯，筋疲力盡，佢真係忙到仔都冇時間湊，聲都乾晒。」由謝安琪扯到時下歌手走音甩嘴忘記歌詞樣樣齊，肥媽對此說：「o依家唔係歌手，係偶像，係搵錢機器，有係公司簽佢先學唱歌，你好難令到佢係真係唱歌技巧好，唱歌同練功一樣你都係需要時間，所以我贊成所有電台電視台搞歌唱比賽，能夠發掘多真係可以做歌手，最好乜都比賽，咁就最好喇。」陳潔靈也說：「世事係一種淘汰賽，好似Twins咁，我覺得佢好成功呀，如果唱得太好太OK，13歲跟唔到呀，o依家咁樣就叫恰如其份。」